பிள்ளைகள் செய்துபார்க்க எளிய விஞ்ஞான சோதனைகள்!

sothanai

 

 

எனது பள்ளிப்பருவத்தில் பாடங்கள் தவிர்த்த மற்ற விஷயங்களில் ஆர்வம் அதிகமிருந்தது. அதற்காக வாங்கிய அடிகளும் அதிகம்தான். எந்த விளையாட்டுப்பொருளை எடுத்தாலும் அதனைப் பிரித்து, ஆராய்ந்து மீண்டும் அதேபோல மாட்டிவிடுவேன். மீண்டும் சரியாக பொருத்தமுடியாதபோது, உதைபடுவேன். செய்துபார் என்று எந்த நூலில் படித்தால் அதனை அப்படியே செய்துபார்க்கும் பழக்கமும் இருந்தது எனக்கு!

ஒருமுறை எங்கள் ஊருக்கு கியாஸ் பலூன் விற்பவர் ஒருவர், மூன்று சக்கர ட்ரைசைக்கிளில் ஓர் உருளையைக்கட்டிக்கொண்டுவந்து, பலூனில் கியாஸ் நிரப்பி விற்பனை செய்தார். அந்த பலூனில் நீளமான நூலைக்கட்டிக்கொடுப்பார். அதைப் பிடித்துக்கொண்டு நாம் ஓடும்போது, பலூனும் அப்படியே மேலே பறந்தபடியே வரும். பட்டத்தைப் பிடித்துக்கொண்டு ஓடும்போது நல்ல காற்றுவேண்டும். அப்போதுதான் அது பறக்கும். ஆனால் கியாஸ் பலூனுக்கு காற்று எல்லாம் ஒரு மேட்டரே அல்ல.

வீட்டுக்குள் வந்து பலூனை விட்டால், அது மேலே விட்டத்தில் ஒட்டிக்கொள்ளும். இன்னொரு சமயத்தில்தான் அந்த கியாஸ் பெயர் ஹீலியம் என்றும், இவ்வகை பலூன்களை நாமளே செய்யலாம் என்பது பற்றியும் எதிலோ படித்தேன்.
அதன் செய்முறை இதுதான்: ஒரு பாட்டிலில், (அப்போது சப்பையான சாராய பாட்டில்கள் இலகுவாகக் கிடைக்கும். அல்லது மருந்து பாட்டில் ஏதாவது எடுத்துக்கொள்ளவேண்டும்.) பாதி அளவுக்கு அலுமினிய பேப்பரை இட்டு நிரப்பவேண்டும். ( மருத்து சுற்றிவரும் அலுமினியமோ, சிகரெட் பெட்டிக்குள் வரும் அலுமினியமோ உதவும். – அக்காலத்தில் சிகரெட் பெட்டிக்குள் வரும் அலுமினியத்தை எளிதாக உரித்து எடுத்துவிடலாம்) அப்புறம் சின்ன கோலிக்குண்டு அளவுக்கு ஒரு சுண்ணாம்பு உருண்டையைப் பாட்டினுள் இடவேண்டும். அப்புறம் முக்கால் பாட்டில் தண்ணீர் (வெதுவெதுப்பான நீர் உத்தமம்) ஊற்றவேண்டும்.

இப்போது பாட்டிலின் வாயில் ஒரு பலூனை மாட்டி, வெயிலில் வைக்கவேண்டும். ஒருமணி நேரத்திற்கும் மேல் ஆகும் என்பதால் பாட்டிலை வெயிலில் வைத்துவிட்டு, நான் நிழலில் காத்திருப்பேன். வெயில் ஏற ஏறப் பாட்டிலின் உள்ளே வேதியல் மாற்றம் நிகழ்ந்து, கியாஸ் உருவாகும். அந்த கியாஸ் பலூனில் நிறைய பலூன் உப்பியபடியே வரும். அதைக் கவனமாக பிரித்து, பலூனின் வாயில் நூலைக்கொண்டு முடிச்சு போட்டுவிட்டால் கியாஸ் பலூன் தயார்.
இப்படியே ஒரு நாளில் அதிகபட்சமாக 8 & 10 கியாஸ் பலூன்கள் வரை தயாரித்துள்ளேன். எதற்காக இந்தக் கதை என்கிறீர்களா?

சமீபத்தில் இப்படியான வேடிக்கையான சோதனை முயற்சிகள் செய்துபார்க்கும் படியான நூல்களைப் படிக்க வாய்த்தது. அது கிளறிய நினைவுகள்தான் மேலே சொல்லப்பட்டவை.

ஆயிஷா இரா.நடராசன், வேதியியல், இயற்பியல், உயிரியல் ஆகிய மூன்று துறைகளில் ’10 எளியச் சோதனைகள்’ என்ற நூல் வரிசை எழுதி இருக்கிறார். தமிழ்நாடு அறிவியல் இயக்கத்துடன் இணைந்து, புக்ஸ் ஃபார் சில்ட்ரன் இப்புத்தகங்களை வெளியிட்டுள்ளது. 2007ம் ஆண்டில் முதற்பதிப்பு கண்ட, இந்நூல்களின் ஆறாம் பதிப்பைத்தான் நான் படித்தேன்.

கற்றலில் ஆர்வமுடைய உங்கள் குழந்தைக்கு இந்தமாதிரியான நூல்களை வாங்கிக்கொண்டுங்கள். இப்படியான சோதனைகளுக்கு குழந்தைகளை ஊக்குவியுங்கள். 10 வயதுடைய குழந்தையும் இச்சோதனைகளைச் செய்துபார்க்கும்படி எளிமையாக எழுதப்பட்டுள்ள நூல் இது. யாருக்குத்தெரியும் நாளை, உங்கள் பிள்ளையும் ஏதாவது ஒரு துறையில் ஆர்வம் ஏற்பட இச்சோதனைகள் துணை புரியலாம்.

ஒரு நூலில் விலை ரூ.20/- மட்டுமே. மூன்று நூல்களும் சேர்த்து ரூ.60/-.

மூன்றிலுமாக சேர்த்து மொத்தம் 30 சோதனைகள். செய்முறைப் படங்களுடன் உள்ளது. இச்சோதனைகளின் பின்னால் இருக்கும் அறிவியல் விளக்கமும் கொடுக்கப்பட்டுள்ளது.

நூல்கள்: 10 எளியச் சோதனைகள் (வேதியியல், இயற்பியல், உயிரியல்)

ஆசிரியர்: இரா. நடராசன்.

வெளியீடு: புக்ஸ் ஃபார் சில்ட்ரன் (பாரதி புத்தகாலயம்)

நூல் தேவைக்கு: 044-24332424/24332924
#வாசிப்பு #வாசகப்பரிந்துரை #சிறுவர்_நூல் #இளையோர்_நூல்

Posted in வாசகப்பரிந்துரை, வாசிப்பனுபவம், புத்தகங்கள் | Tagged , , , | Leave a comment

பதின்ம வயதினருக்கான நாவல்!

No automatic alt text available.

பதின்ம வயதினர் படிக்க ஏதுவான புனைவு நூல்கள் தமிழில் வருவதில்லை என்ற குறை எனக்கு எப்போதும் உண்டு. ஒன்று அவர்கள் சிறுவர் நூல்களைப் படிக்கவேண்டும் இல்லையெனில் பெரியவர்கள் நூலினை படிக்கும் நிலைதான் உள்ளது.

இதுபற்றி தோழி ஒருத்தியிடம் பேசிக்கொண்டிருந்தபோது, மேலை நாடுகளில் பதின்ம வயதினருக்கான புவைவெழுத்துக்கள் அதிகம் வாசிக்கக்கிடைக்கின்றன என்றார். எனக்கு அந்த ஏக்கம் இங்கே எப்போதும் உண்டு.

ஆனால் இக்குறையை போக்கும்படியாக, சமீபத்தில் பதின்ம வயதினருக்கான ஒரு கதையை வாசித்தேன். கொ.மா.கோ. இளங்கோ எழுதிய, ’சஞ்சீவிமாமா’என்ற புதினம்தான் அது.

முழு கிராமமும், நகரமுமில்லாத ஒரு சிற்றூரில் வசிக்கும் பேச்சிராசு என்ற சிறுவனுக்கும், அதே ஊரில் துப்புரவுத் தொழிலாளியாக பணியாற்றும் சஞ்சீவி என்பவருக்கும் இடையில் ஏற்படும் நட்பும் கதையின் மையம். சாதிய பாகுபாடு, சாதிய ஒடுக்குமுறை பற்றி எல்லாம் அச்சிறுவன் சிந்திக்கிறான். அவர்களும் மனிதர்கள்தானே என்று அச்சிறுவனின் மனதில் தோன்றும் கேள்விகளுமாகக் கதை செல்கிறது. 80களில் ஒரு சிற்றூரின் எப்படி இருந்திருக்கும்/ இருந்தது எனும் புவியியலை கண்முன் கொண்டுவருகிறார் நூலாசிரியர். ஓவியர் அர்ஸ் கதைகளுக்கிடையே வரைந்திருக்கும் ஓவியங்கள் கூடுதல் பலம்.

இன்றைக்குக் குழந்தைகளை சாதிய பெருமிதமற்றவர்களாகவும், சாதிய மோக மற்றவர்களாக வளர்க்க விரும்புகிறவர்களும், சாதீய ஒடுக்குமுறையில்லா சமூகம் உருவாக வேண்டும் என்பவர்களும் தங்களின் குழந்தைக்கு இந்நூலைப் பரிசளிக்கலாம். அதற்கு இந்நூல் நிச்சயம் துணை புரியும்.

நூல்: சஞ்சீவி மாமா
வெளியீடு: புக்ஸ் ஃபார் சில்ட்ரன் (பாரதிபுத்தகாலயம்)
விலை: ரூ.90/-
தொடர்புக்கு: 044-24332424

 

#வாசிப்பு #வாசகப்பரிந்துரை #சிறுவர்_நூல்

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , , | Leave a comment

உலகம் கொண்டாடும் குட்டிக் கடற்கன்னி கதை தமிழில்!

kadalkanni_wr

ஹான்ஸ் கிறிஸ்டியன் ஆண்டர்சன் – சிறுவர் இலக்கிய உலகில் பெரிய அளவில் போற்றப்படும் முக்கியமான படைப்பாளி.

இவரது பல கதைகள் உலகின் பலமொழிகளில் மொழிபெயர்க்கப்பட்டுள்ளன. கூடவே அனிமேஷன் படங்களாகவும், சினிமாகவும் எடுக்கப்பட்டுள்ளன. சிவரது படைப்புகளில் எல்லோரும் மறக்காமல் சொல்லுவது குட்டிக்கடற்கன்னி என்ற சிறிய நாவலைத்தான்.

இந்த உலகில் கடலைக்கண்டு வியக்காதவர்கள் இருக்க முடியாது. அந்தக்கடலில் நுரை பொங்கும் அலைகளையும் பார்த்திருப்போம். கடலின் நுரைகளுக்குப் பின் ஒரு கதை இருக்கிறது. அதுவொரு குட்டிக் கடற்கன்னியின் வாழ்க்கைக்கதை. கடலுக்குள் இருக்கும் வரை மரணமில்லாத வாழ்வு பெற்ற குட்டிக்கடற்கன்னி தனது களங்கமில்லாத அன்புக்காகக் கரையேறத்துணிகிறாள். இக்கதை வாசிக்கும் நம்மை அவளது அன்பு பாதிக்கும். நூலை மூடிவைத்த பின்னும் இக்கதையைப் பற்றியே கொஞ்ச நேரம் யோசித்துக்கொண்டிருப்போம்.

டென்மார்க்கில் நிறுவப்பட்டுள்ள கடற்கன்னி

டென்மார்க்கில் நிறுவப்பட்டுள்ள கடற்கன்னி

உண்மையில் இக்கதையின் மிகப்பெரிய வெற்றி என்ன தெரியுமா? குட்டிக்கடற்கன்னிக்கு டென்மார்க்கின் கடற்கரையொன்றில் தாமிரச்சிலையை நிறுவி உள்ளனர். இச்சிலைப் பல அரசியற்காரணங்களுக்காக பாதிப்புக்குள்ளாகும் போதும், அரசு உடனடியாக இச்சிலையை மீட்டு, பாதுகாத்து வருகிறது என்றால் இக்கதாபாத்திரத்தின் மீது அம்மாக்களுக்குள்ள அன்பை உணர்ந்துகொள்ள முடியும்.

தமிழ் வாசிக்கத்தெரிந்த 8 வயதிற்கு மேற்பட்ட குழந்தைகள் வாசிக்க ஏதுவான நூல். மூலத்தின் அழகு குன்றாமல் தமிழில் இக்கதை வானம் பதிப்பகம் வெளியிட்டுள்ளது. கதைகளுக்குச் சிறப்பான ஓவியங்களும், நூலின் வடிவமைப்பும் வாசிப்பவர்களை மகிழ்ச்சி அடையச்செய்யும்.

நூல்: குட்டிக்கடற்கன்னி
தமிழில்: தமிழ்செல்வன்

விலை:- 40/-
வெளியீடு: வானம் பதிப்பகம் (9176549991)

#thamizhbooks #thamizhbookscbf

#வாசிப்பு #வாசகப்பரிந்துரை #சிறுவர்_நூல்

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , , , , , | Leave a comment

பால்யத்தை உயிர்ப்பித்த பதின்

pathin

 

“புத்தகம் வாசிக்கிறதால என்ன பாஸ் கிடைக்கும்?” என்று ஒரு நண்பர்,  பல ஆண்டுகளுக்கு முன் கேட்டார்.

அதே மாதிரியான கேள்வியை பல சந்தர்ப்பங்களில் வேறு சிலரிடமும் எதிர்கொண்டிருக்கிறேன். இதற்குப் பதில் என்னிடம் எப்போதும் ஒரே மாதிரியாக இருந்ததில்லை. அப்போதைய மனநிலையைப் பொறுத்து மாறிக்கொண்டே இருக்கும்.

இக்கேள்வி பொதுவான வாசிப்பு பற்றியது என்பதால் அப்படி. குறிப்பிட்ட நூல் பற்றி என்றால் அதற்கென தனித்தனி பதில் சொல்ல முடியும்.

அப்படியொரு நூலைப்பற்றித்தான் இங்கே குறிப்பிட விரும்புகிறேன். எஸ்.ராமகிருஷ்ணன் எழுதிய ‘பதின்’சமீபத்தில் படித்து எனை மறந்த நூல்.

நூலில் தொடக்கத்திலேயே “இதில் வரும் நான் என்ற சொல் என்னைக் குறிக்கவில்லை. நம்மைக் குறிக்கிறது” என்று சொல்லிவிடுகிறார். அது நூறு சதவிகிதம் உண்மை. சந்தேகமில்லாமல் நம்மை நமது பால்யத்திற்கும், பதின்ம வயதிற்கும் அழைத்துச்செல்கிறது இந்நூல்.

இது புனைவு அல்லது அபுனைவு என்று வகைமைப் படுத்தமுடியாது என்றே தோன்றுகிறது. 216 பக்கங்களில் விரிந்துகிடக்கும் நினைவுகளின் குறிப்புகள்.

இதில் வரும் சங்கர் போன்றே எனக்கும் ஒரு நண்பன் இருந்தான். அவனோடு நானும் ஒரு அற்ப காரணத்திற்காக சண்டையிட்டுக்கொண்டு பிரிந்துவிட்டோம். சுமார் 20 ஆண்டுகள் கழித்து, ஊருக்குச்சென்றபோது அவனைப் பார்த்தேன். அவன் முகத்தைத் திருப்பிக்கொண்டு போய்விட்டான்.

கூட்டத்தில் ஸ்பெல்லிங் கேட்ட அறிவாளிமாதிரியான ஆளை நானும் கடந்திருக்கிறேன். இப்படி அடுக்கிக்கொண்டே போகலாம். ஞாபக அடுக்குகளின் அடியில் புதைந்துபோன பல சம்பவங்களும், மனிதர்களையும் மீண்டும் உயிர்ப்பித்துக் கொடுத்த புத்தகம் இது.

நீங்கள் 30 வயதைத் தொட்டவராக இருந்தால் அவசியம் வாசியுங்கள். நிச்சயம் உங்கள் வாழ்வில் நீங்களே மறந்துபோன பலரையும் இந்நூல் நினைவுபடுத்தும்.

ஒரே மூச்சில் வாசிக்காமல். பழைய சம்பவங்களையும் நபர்களையும் நினைத்துக்கொண்டு நூலை மூடி வைத்துவிட்டேன். பின்னர் சில பக்கம். மீண்டும் பழையபடி நினைவோடை. மீண்டும் வாசிப்பு என்று ரசித்து ரசித்து வாசித்தேன். அதுபோல, இந்நூலை வாசிக்கும் எனக்கு இப்படியெல்லாம் தோன்றுகிறதே.. பால்ய/பதின் பருவ தோழிகள் அல்லது பெண்கள் இந்நூலினை வாசிக்கும் போது அவர்கள் எப்படி உணர்வார்கள் என்பதை அறிய ஆவலாக இருக்கிறேன்.

நூல்: பதின்
ஆசிரியர்: எஸ்.ராமகிருஷ்ணன்.
வெளியீடு: உயிர்மை பதிப்பகம், சென்னை

 

#வாசிப்பு #வாசகப்பரிந்துரை #பதின் 

Posted in மதிப்புரைகள், வாசகப்பரிந்துரை, வாசிப்பனுபவம், புத்தகங்கள் | Tagged , , , , , , | Leave a comment

இளையோருக்கான தொடக்க நூல்

ariviyal

பதிம வயதை அடையும் பிள்ளைகளுக்கு நான் சொல்லிக்கொடுக்கவேண்டிய விஷயங்களின் பட்டியல் மிகவும் நீண்டது.

அறவுணர்ச்சியை அடிப்படையானது என்றாலும் கூடவே, இச்சமூகத்தின் மீது அக்கறைகொண்ட குடிமகனாக நம்பிள்ளை வளரவேண்டும்.

நல்ல மனிதனாக வளருவதற்கு, அவர்களோடு நாம் உரையாடலைத்தொடங்க இந்த வயது சரியானது. மொட்டைத்தாத்தா குட்டையில் விழுந்தார் என்று பொருளற்று எதையும் தொடங்கிவிடுவதை விட, மேலானது ஒரு நூலை நாம் வாசித்து, பின் அவர்கள் கையில் அதனைக்கொடுத்து, அதன் வழியே உரையாடலைக் கொண்டுபோவதென்பது சிறப்பு.

அந்த வகையில் ச. தமிழ்ச்செல்வன் எழுதி இருக்கும் ‘அன்றாட வாழ்வில் அறிவியல்’ எனும் நூல் முக்கியமானது.

மொத்தம் எட்டு கட்டுரைகள் அடங்கி உள்ள சிறு நூல் இது. ஆனால் எட்டாத பல விஷயங்களைப் பேசுகிறது. நகைச்சுவையாக எழுதப்பட்டிருக்கும் இக்கட்டுரைகள் வாசிப்போரை வசப்படுத்தும். ‘உனக்கு மூளை இருக்கா’ என்று தொடங்கி, ‘சமைப்பது யாருடைய வேலை?’, ‘உன் சாதி என்ன? ’, ‘வரலாறு’ ‘புவியியல்’ என்று பல தளங்களையும் தொட்டுச்செல்லும் இக்கட்டுரைகள் எளிமையான மொழியில் சிந்தனையைத்தூண்டும் விதத்தில் எழுதப்பட்டுள்ளன.

புனைவு நூல்களைப்போல, இதனை வெறுமனே வாசிப்பு சுகத்திற்காக வாசிக்கக்கூடாது. முதலில் பெற்றோர் வாசிக்க வேண்டும், பின்னர் பிள்ளைகளுக்கு கொடுக்கவேண்டும். அதன் பின் அவர்களின் நண்பர்களுக்குக் கொடுத்து வாசிக்கச்சொல்லவேண்டும். அதன் பிறகு எல்லோரும் அமர்ந்து இக்கட்டுரையில் இருக்கும் அறிவியலையும், நாம் கடைப்பிடிக்கவேண்டிய பழக்கங்களையும் உரையாடல் வழி அடுத்தகட்டத்திற்கு எடுத்துச்செல்லவேண்டும்.

பெற்றோர் என்றில்லாமல், மாணவர்களின் வாழ்விலும், எதிர்காலத்தின் மீது அக்கறையும் உடைய ஆசிரியர்களும் இப்பணியைச்செய்யலாம். இச்சிறுநூல் மாற்றத்திற்கான விதையை விதைப்பதில் நல்ல தொடக்கமாக அமையும்.

நூல்: அன்றாட வாழ்வியலில் அறிவியல்.

ஆசிரியர்: ச.தமிழ்ச்செல்வன்

விலை: ரூ. 40/-

பதிப்பகம்: அறிவியல் வெளியீடு, கோபாலபுரம், சென்னை
(பாரதி புத்தகாலயத்தில் விற்பனைக்குக் கிடைக்கும்:)

பாரதி புத்தகாலயம்; நூல் தேவைக்கு: 044-24332924 / 24332424
#thamizhbooks #thamizhbookscbf

#வாசிப்பு #வாசகப்பரிந்துரை #சிறுவர்_நூல் #இளையோர்_நூல்

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , , , , | Leave a comment