மீனவர்களின் துயரத்தை படம்பிடிக்கும் – வலை

valai

மீன் பிடிக்க கடலுக்குப் போன பிள்ளை திரும்புவான் எனப் பல ஆண்டுகளாகக் காத்திருக்கும் தாய்.

பிறக்கும் பிள்ளைக்கு அப்பாவைப் புகைப்படத்தில் மட்டுமே இனி காட்டமுடியும் என்று உள்ளுக்குள் உடைந்து அழுதுகொண்டிருக்கும் பிள்ளைத்தாச்சி.

குடும்ப பாரத்தை சுமக்கப் பள்ளி இறுதியைக்கூடத் தொடாமல் வேலைக்குப்போன பிள்ளைகள்

-இப்படி நூற்றுக்கணக்கான மீனவக் குடும்பங்களை பாம்பன் தீவுக்குள் பார்க்க முடியும். இன்னும் சொல்லப்போனால், ராமேஸ்வரத்தில் 500க்கும் குறைவான வீடுகள் கொண்ட, ஒரு சிறுகிராமத்தில் கணவனை இலங்கை ராணுவத்திற்குக் காவுகொடுத்த பெண்கள் வீட்டுக்கு ஒருவரையாவதுப் பார்க்கமுடியும்.
முதல் நாள் இரவு அமர்ந்து கதை பேசிவிட்டு, விடியக்காலை கடலுக்குப் போய், பிணமாகத்திரும்பி வந்த நண்பனை நானறிவேன். இருக்கின்ற ஒரே பிள்ளையை பறிகொடுத்து, பித்துப்பிடித்துப்போன தாயையும் நானறிவேன்.

முப்பது ஆண்டுகளுக்கு மேலாக மீன் பிடிக்கச்செல்லும் மீனவனின் படகுகளையும், வலைகளையும் சேதப்படுத்துவது, தொடங்கி, அடித்து முடமாக்குவது, சுட்டுக்கொல்லுவது என்று இலங்கை ராணுவம் செய்துவரும் கொடுமைகளை எளிதில் சொல்லிவிடமுடியாது.

மீனவ மக்களின் துயரங்களை வலை எனும் தனது குறுநாவல் மூலம் அழுத்தமாகப் பதிவு செய்ய முயன்றிருக்கிறார் நூலாசிரியர் ஜான்பாபு.

அந்தோணி வாங்கிய கடனுக்காக உயிர் பிரியும் வரைக்கும் உழைத்துக்கொண்டிருக்கிறார். அவரது மரணத்திற்குப்பின், பள்ளிப்படிப்பைப் பாதியிலேயே நிறுத்திவிட்டு கடலுக்குப் போகிறான் சூசை. தன் அப்பா விட்டுச்சென்ற சுமையை அதன் பின் அவன் சுமக்கிறான். இதற்கிடையில், சூசை, மலர் ஆகியோரின் பதின்பருவக்காதல் எளிமையாகப் பதிவு செய்யப்பட்டுள்ளது. சூசை சிலோன் நோவியிடம் அடிவாங்கி வாங்கித் திரும்பி வரும் காட்சிகள் வாசிக்கும் நமக்குள்ளும் ஒருவித பதைபதைப்பை ஏற்படுத்துகிறது. கதையின் முடிவு யதார்த்தம் என்றாலும் அந்தப் பாத்திரங்களின் வலி, கதையை வாசிக்கும் நமக்குள்ளும் ஏற்படுகிறது.

300 பக்கங்களுக்கு மேல் நீளக்கூடிய கதையை வெறும் 111 பக்க நூலாகச் சுருக்கி இருப்பது மட்டுமே பெருத்த ஏமாற்றம்.

இக்குறுநாவல் குறுகிய காலத்திலேயே இரண்டாம் பதிப்பு கண்டிருக்கிறது என்பதையும் நூலாசிரியரின் உரையில் காணமுடிகிறது. இது நாவலாசிரியரின் முதல் நூல் என நம்புகிறேன். அதனால் சில/பல இடங்களில் தென்படும் இடர்களையும் தாண்டி ஒரு நம்பிக்கை கொடுக்கக்கூடிய எழுத்தாகத் தெரிகிறது.

நாளும் கிழமையும் நலிந்தோருக்கு இல்லை என்பார்கள். அது அப்படியே மீனவ மக்களுக்கும் பொருந்தும்.

நூலாசிரியர் தனது அடுத்தடுத்த படைப்புகளில் இன்னும் கூடுதல் கவனம் செலுத்தி, அதற்காக உழைத்து, காலத்தால் அழியாத படைப்புக்களை தருவார் என நம்புகிறேன்
நூல்: வலை
ஆசிரியர்: ஜான் பிரபு
விலை. ரூ.99/-

வெளியீடு ஜீவா பதிப்பகம், சென்னை
தொடர்புக்கு: 99942-20250

#வாசிப்பு #வாசகப்பரிந்துரை

Posted in நூல் விமர்சனம், வாசகப்பரிந்துரை, வாசிப்பனுபவம், புத்தகங்கள் | Tagged , , , , , , , , | Leave a comment

காகங்கள் ஏன் கருப்பாச்சு?

kakam

கிச்சா பச்சா என்று இரண்டு காகங்கள், தாங்கள் ஏன் கருப்பாக இருக்கிறோம்..? என்ற கேள்விக்கு விடை தேடி பயணப்படுகின்றன. இதுதான் விழியனின் கிச்சா பச்சா நூலின் ஒன் லைனர்.

மொத்தம் 9 அத்தியாயங்கள் கொண்ட கதை. ஒவ்வொரு அத்தியாயத்திலும் ஒவ்வொரு விலங்குகளைச் சந்தித்து, தாங்கள் ஏன் கருப்பாக இருக்கிறோம் என்ற கேள்விக்கு விடை தேட முயல்கின்றன.
விலங்குகள் சொல்லும் எந்தப் பதிலும் இவற்றைச் சமாதானப்படுத்தவில்லை என்பதால் இவற்றின் பயணம் தொடர்கிறது. நமக்கும் சுவாரஸ்யமான கதை கிடைக்கிறது.
தொடர் பயணத்தில், ஒரு காக்கை துறவியைச் சந்தித்து, காலத்தில் பின்னோக்கிச்செல்லும் மந்திரத்தைக் கற்றுக்கொண்டு, பயணிக்கின்றன. அங்கே நாம் இதுவரை படித்தறிந்த காகங்களின் கதைகளில் வரும் பாத்திரங்களைச் சந்திக்கின்றன. அவற்றுடன் நடைபெறும் உரையாடல் வழியே, நாமறிந்த பழைய கதைகளை, நமக்கு நினைவுபடுத்துகிறார் நூலாசிரியர், இடையில் ஒரு நாடோடிக்கதையையும் வாசிக்க முடிகிறது.
பின்னோக்கிப் பறந்து பறந்து… அப்படியே, டைனோசர் வாழ்ந்த காலத்திற்குள் சென்றுவிடுகின்றன. அதனிடமும் அதே கேள்வியைக் கேட்டு, அது சொல்லும் பதிலையும் அறிந்துகொள்கின்றன கிச்சாவும் பச்சாவும். காகங்கள் கருப்பானதற்கு என்ன காரணம் என்ற கேள்விக்கு, டைனோடர் சொன்ன பதில் என்ன? அப்பதில் இவற்றிற்குத் திருப்தியாக இருந்ததா இல்லையா என்பதை எல்லாம் நீங்கள் நூலை வாங்கி அறிந்துகொள்ளலாம்.
தமிழில் வாசித்துப் புரிந்துகொள்ளக்கூடிய குழந்தை முதல் எல்லோரும் வாசிக்கலாம். ஓவியர் T.N.ராஜனின் ஓவியங்கள் இக்கதையின் பெரிய பலம். ஒவ்வொரு அத்தியாயத்திற்கும் குறைந்தது நான்கு முதல் ஆறு படங்கள் வரை வரைந்திருக்கிறார். நூல் வடிவமைப்பும் சிறப்பாக இருக்கிறது.
நூல்: கிச்சா பச்சா
ஆசிரியர்: விழியன்
விலை: ரூபாய். 40/-
வெளியீடு: வானம் பதிப்பகம் (9176549991)
https://goo.gl/hQoXE4
#thamizhbooks #thamizhbookscbf
#வாசிப்பு #வாசகப்பரிந்துரை #சிறுவர்_நூல்

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , , | Leave a comment

மதுரைக்கு வந்த வேற்றுக்கிரக வாசிகள்

sivappu

ஐந்தாம் வகுப்பில் படிக்கும் அருண் என்ற சிறுவனும், அவனது நண்பர்களும் ஒரு வேற்றுக்கிரக்க வாசியைச் சந்திக்கிறார்கள். அதனுடன் விண்கலத்தில் பயணமாகி, அதன் உலகிற்குச் செல்கின்றனர். அங்கே என்னென்ன பார்த்தார்கள் என்ன கற்றுக்கொண்டார்கள் என்பதைக் குழந்தைகளுக்கான மொழியில் எளிமையாக எழுதியுள்ளார் நூலாசிரியர் க.சரவணன்.

மதுரையில் ஒதுக்குப்புறமாகக் குடிசையில் வாழும் ஏழ்மையான குடும்பத்தைச் சேர்ந்தவன் அருண். அவனுடைய நண்பர்களோ வேறு பகுதியில் வசிக்கும் மத்தியதர குடும்பத்தினர். அருண் வீட்டில் மின்சாரம் இல்லை என்பதே நண்பர்களுக்கு பெரும் அதிர்ச்சியான செய்தி. அதோடு அவனுடனேயே சென்று அவனது வீட்டில் தங்கி, அவன் வாழ்க்கையை, இக்குழந்தைகள் உணரும் தருணத்தினை அழகாகப் பதிவு செய்துள்ளார்.

குழந்தைகளின் வாசிப்புக்கு ஏற்ற சுவாரஸ்யமான கதை.

++++++++++++++++++
நூல்: சிவப்புக்கோள் மனிதர்கள்

ஆசிரியர்: க. சரவணன்

விலை: ரூ.50/-

வெளியீடு: புக்ஸ் ஃபார் சில்ட்ரன் (பாரதி புத்தகாலயம்)

நூல் தேவைக்கு: 044-24332924 / 24332424

#வாசிப்பு #வாசகப்பரிந்துரை #சிறுவர்_நூல்
#இளையோர்_நூல்

#thamizhbooks #thamizhbookscbf

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , | Leave a comment

வீரம் விளைந்தது (இளையோர் பதிப்பு)

veeram vilainthathu small tamil

வீரம் விளைந்தது (இளையோர் பதிப்பு)
நிக்கொலாய் ஒஸ்திரோவ்ஸ்கி – தான் எழுதிய ஒரே புத்தகத்தின் மூலம் உலகம் முழுவதிலும் பிரபலமானவர். அந்த நாவலின் பெயர், ‘வீரம் விளைந்தது’ உலகப்புகழ்பெற்ற ரஷ்ய நாவல் இது.

பாவெல் என்ற இளைஞனின் கதை இது. அவனது பிறப்பு, சிறுவயதில் அவன் அடையும் துயரங்கள், பின் ரஷ்ய ராணுவத்தில் அவன் பணியாற்றியபோது செய்த சாகசங்கள் பற்றி எல்லாம் விரிவாக சொல்லப்பட்டிருக்கும்; பின் ஒரு போரில் காயம்பட்டு, படுக்கையில் சாய்கிறான் பாவெல். ஆனாலும் கம்யூனிஸ்ட் கட்சியின் இளைஞர் பாசறைக்கு பொறுப்பேற்றுச் சிறப்பாக வழிநடத்துகிறான். கொஞ்ச நாட்களில் நடக்க இயலாமல் போகிறது. படுத்த படுக்கையில் வீழ்கிறான் பாவெல். அதன் தொடர்ச்சியாக கொஞ்சம் கொஞ்சமாக அவனது பார்வையும் பறிபோகிறது. அந்தச் சமயத்தில் அவன் ஒரு கதை எழுத நினைக்கிறான். கம்யூனிஸ்ட் கட்சியிடம் ஒரு உதவியாளரைக் கோருகிறான். உதவியாளரைக் கட்சி ஏற்பாடு செய்கிறது. பாவெல் சொல்லச்சொல்ல.. அந்த உதவியாளர் எழுதுகிறார். எழுதிமுடிக்கப்பட்ட அந்தப் புதினம், அச்சுக்குச் செல்கிறது. அதுதான் இந்த ’வீரம் விளைந்தது’புதினத்தின் கதைச்சுருக்கம்.

புனைவு போல எழுதப்பட்ட இது ஒரு தன் வரலாற்று நூல். 32 ஆண்டுகள் மட்டுமே உயிர் வாழ்ந்தவர் ஆஸ்த்ரோவ்ஸ்கி. தனது கடைசி 12 ஆண்டுகள் பார்வையற்றவராகவும் படுக்கையிலும் கழித்தவர்.

இந்த நாவலை எழுதி முடித்ததும்,  “ இந்நாவலை எழுதி முடித்ததும், என்னைச் சுற்றிவளைத்திருந்த இரும்பு வளையமொன்றிலிருந்து விடுபட்ட உணர்வு பெற்றேன். அசைய முடியாமை என்ற துன்பத்தை வென்றேன். மறுபடியும் போர்வீரர்களில் ஒருவனாக மாறிவிட்டேன்.” என்ற வாசகமும் பிரபலமானது.

இக்கதையை மையப்படுத்தி, திரைப்படங்களும் வெளிவந்துள்ளன. உலகின் சுமார் 48 மொழிகளில் மொழியாக்கம் செய்யப்பட்டுள்ளது.

நிறையப் ஓவியங்களுடன், இக்கதையை ரஷ்யா இளையோர் பதிப்பாக வெளியிட்டிருந்தது. அதனை மறு ஆக்கம் செய்து, தமிழில் எழுதி உள்ளார் ஆதி. வள்ளியப்பன்.

உலகம் போற்றும் ஓர் உன்னதப்படைப்பை, பதின் வயதுடை பிள்ளைகளின் பெற்றோர், தங்கள் பிள்ளையின் நல்ல  வாசிப்பின் தொடக்கத்திற்கு இதனை  வாங்கிக் கொடுக்கலாம். சிறப்பான வடிவமைப்பில் முழு பக்கங்களும் வண்ணத்தில் அழகுற அச்சிட்டுள்ளனர்.

++++++++++++++++++++++++++

நூல்: வீரம் விளைந்தது (இளையோர் பதிப்பு)

தமிழில்: ஆதி. வள்ளியப்பன்

வெளியீடு: புக்ஸ் ஃபார் சில்ட்ரன்,

விலை: ரூ.50/-

வெளியீடு: புக்ஸ் ஃபார் சில்ட்ரன் (பாரதி புத்தகாலயம்)

நூல் தேவைக்கு: 044-24332924 / 24332424

#வாசிப்பு #வாசகப்பரிந்துரை #சிறுவர்_நூல்
#இளையோர்_நூல்

Posted in சிறுவர் இலக்கியம், மதிப்புரைகள், வாசகப்பரிந்துரை, வாசிப்பனுபவம், புத்தகங்கள் | Tagged , , , , , , , | Leave a comment

சேவல் ஏன் கூவுகிறது தெரியுமா? இந்திய சிறுவர் நாடோடிக்கதைகள்

yaanai parantha pothu

 

சேவல் ஏன் கூவுகிறது தெரியுமா? ஆம்… அதற்கொரு கதை இருக்கிறது. இந்திய சிறுவர் நாடோடிக்கதைகள் படித்தபோது, அதற்கான காரணத்தைத் தெரிந்துகொண்டேன்.

நாடோடிக்கதைகளின் ஆசிரியர்கள் இன்னாரென்று கூறமுடியாது. பலவும் வாய்மொழியாகச் சொல்லப்பட்டு, அப்படியே எல்லைகள் கடந்து பல தேசங்களையும் இக்கதைகள் அடைந்துள்ளன.

அவற்றை ஆங்காங்கே தொகுத்து எழுத்துவடிவில் சிலர் பதிவு செய்தும் வைத்துள்ளனர். அதனாலேயே இக்கதைகள் சாகாவரம்பெற்று இன்னும் உயிர்ப்போடு இருக்கின்றன என்றே சொல்லலாம்.

இந்திய தேசத்தில் சொல்லப்படுகின்ற பல நாடோடிக் கதைகளில் சிலவற்றைத் தொகுத்து, சுட்டிவிகடனில் தொடராக எழுதியுள்ளார் ரமேஷ் வைத்யா. அக்கதைகள் இப்போது தனிநூல்வடிவம் பெற்றுள்ளது.

தமிழ் வாசிக்கத்தெரிந்த, பத்து வயதிற்கு மேற்பட்ட எவரும் படித்து புரிந்துகொள்ளும் வகையில் எளிமையான மொழியில் இக்கதைகள் எழுதப்பட்டுள்ளன. நாடோடிக்கதைகளிலும் ’இதனால் அறியப்படும் நீதி யாதெனில்’என்ற தொனி ஒலிப்பதைக் காணமுடியும். நூலாசிரியர் இக்கதைகளில் கவனமுடன் அதைத் தவிர்த்திருக்கிறார். 25 கதைகளைக்கொண்ட இந்த நூலில் பல கதைகள் எனக்கு புதியதாக இருந்தன. நிறையக் கதைகள் ’அட’ போடவைக்கும் ரகம். சிலகதைகளைப் படிக்கும் போது, நிச்சயம் வாய்விட்டே சிரிப்பீர்கள்.

குழந்தைகள் என்றில்லாமல் பெரியவர்களும் கூட இக்கதைகளைப் படிக்க முடியும். கிட்டதட்ட எல்லாக் கதைகளிலுமே ஒரு சின்ன இடைவெளி இருப்பதைக் காணமுடிகிறது. இந்த இடைவெளியை, தம்  குழந்தைகளுக்கு கதை சொல்லும் பெற்றோர் இட்டு நிரப்பிக்கொள்ளவேண்டும். உங்களின் கற்பனைக்கும் இங்கே இடமுண்டு.

அது போல, நான் எப்போதும் ஒரு விஷயத்தை நம்புகிறவன். சாகசக்கதைகள் என்றாலே லாஜிக் மீறல் தான். அதேவேளை கதைக்குள்ளே லாஜிக் மீறல் இருக்கக்கூடாது என்ற நிலைப்பாடு உடையவன் நான். கதைக்குள் லாஜிக் ஓட்டைகளைக் கச்சிதமாக அடைத்து, கதைகளை எழுதி இருக்கிறார் நூலாசிரியர். இப்படியான கதைகளைக் காணமுடிந்ததில் எனக்கு பெரும் மகிழ்ச்சி.

நூல்களில், முன்னுரை, பின்னுரை பார்த்திருப்போம். இந்நூலில் முன்னுரைகளுக்கு அப்புறம் ஒரு நடுவுரை எழுதப்பட்டிருக்கிறது. 12 கதைகள் படித்த பின் இந்த நடுவுரை வருகிறது. முன்னது பெற்றோரை நோக்கி எழுதப்பட்டிருக்கிறது. நடுவுரை குழந்தைகளை நோக்கி எழுதப்பட்டிருப்பது சிறப்பு. இடையிடையே படங்களும் வாசிப்பை சுவாரஸ்யப்படுத்துகின்றன.

இக்கதைகள் வாசிப்பவர்களுக்கு மகிழ்ச்சியையும் புத்துணர்ச்சியையும் கொடுக்கும் என்பதில் சந்தேகமே இல்லை.

நூல்: யானை பறந்தபோது

ஆசிரியர்: ரமேஷ் வைத்யா

பதிப்பகம்: அகநாழிகை வெளியீடு(9994541010 / 7010134189)

விலை: ரூ.100

 

#வாசிப்பு #வாசகப்பரிந்துரை #சிறுவர்_நூல்

#இளையோர்_நூல்

 

Posted in சிறுவர் இலக்கியம், வாசகப்பரிந்துரை, வாசிப்பனுபவம், புத்தகங்கள் | Tagged , , , , , | Leave a comment