உழைப்புக்கு மரியாதை!

ழைப்பின் பயனை குழந்தைகளுக்குச் சொல்லிக் கொடுங்கள் என்று உங்களிடம் சொன்னால், சண்டைக்கு வந்தாலும் வருவீர்கள்!

படிக்கிற பிள்ளைக்கு இப்போ எதற்கு உழைப்பு பற்றி எல்லாம் என்று கேள்வி தோன்றலாம். உண்மையில் நாம் சொல்லவரும் உழைப்பு என்பது, நீங்கள் நினைக்கிற மாதிரியான உழைப்பு மட்டுமல்ல! என்னடா இது கட்டுரையின் தொடக்கத்திலேயே குழப்புகிறேன் என்று நினைக்க வேண்டாம். மேற்கொண்டு படியுங்கள்..

உழைப்பு உயர்வு தரும்!

உண்மை. இது நம் எல்லோருக்கும் தெரிந்த விஷயம்தான். ஆனால், எந்த உழைப்பு உயர்வு தரும் என்பது நம்மில் எத்தனை பேருக்குத் தெரியும்?

“செக்கு மாடு மாதிரி உழைச்சுக்கிட்டு இருக்கேன். ஆனால், வாழ்க்கையில் முன்னேற்றமே இல்லை” என்று சிலர் புலம்புவதை நீங்கள் கேட்டிருக்கக்கூடும். செக்கு மாடு எப்படி வேலை செய்யும் என்பது உலகுக்கே தெரியும். ஒரே இடத்தைச் சுற்றிச்சுற்றி வரும். அதுமாதிரி நாமும் சுற்றிச்சுற்றி வந்தால், அப்புறம் எப்படி வாழ்வில் முன்னேற முடியும்? இலக்கு தீர்மானித்து இயங்கினால் மட்டுமே இன்றைய சூழலில் வெற்றிபெற முடியும். இதை நாம் நமது குழந்தைகளுக்குச் சொல்லித்தர வேண்டும்.

புரிந்து படிப்பது அவசியம்

பெரியவர்கள் மட்டுமல்ல, குழந்தைகளும்கூட உழைக்கிறார்கள். படிப்பதுதான் அவர்களிடம் நாம் எதிர்பார்க்கும் உழைப்பு. அதையும் அவர்கள் இலக்கின்றி, சரியான திட்டமிடலின்றி செய்தால், அந்த உழைப்புக்கும் பயன் இருக்காது. பாடங்களை அப்படியே படம்பிடிப்பது மாதிரி, மனப்பாடம் செய்வதால் கிடைக்கும் வெற்றி பயனுள்ளதாக இருக்காது. எதையும் புரிந்து படித்தால் மட்டுமே எப்போதும் நினைவில் நிறுத்த முடியும் என்பதை, நம் குழந்தைகளுக்கு அறிவுறுத்த வேண்டும். மனனம் செய்வதால், தேர்வில் வெற்றிபெற முடியும்தான்! ஆனால் இந்த வெற்றி, வாழ்க்கையில் தோற்கத்தான் பயன்படும் என்பதை அவர்களுக்கு தக்க எடுத்துக்காட்டுகளுடன் விளக்குங்கள்.

சிறு வயதில் நாம் பள்ளியில் படிக்கும்போது கணக்குப் பாடத்தில் கற்பிக்கப்பட்ட அல்ஜிப்ரா கணிதம் எப்போதாவது வாழ்க்கையில் பயன்பட்டிருக்கிறதா என்று சிலரிடம் கேட்டபோது, பலரும் இல்லை என்றே பதில் சொன்னார்கள். ஆனால், உண்மையில் நாம் தினம் தினம் அல்ஜிப்ராவைப் பயன்படுத்தி வருகிறோம்.

நீங்களும் உங்கள் துணையுமாக இருவர் வாழும் வீட்டில் உணவுக்கு உலை வைக்க ஒரு கிளாஸ் அரிசி வைப்பது வழக்கம் என்று வைத்துக்கொள்ளுவோம். அன்று விருந்தினர் ஒருவர் வருகிறார் என்று வைத்துக்கொள்ளுங்கள். அப்போது உலைக்கு எவ்வளவு அரிசி போடுவீர்கள்? ஒன்னரை டம்ளர். இதை எப்படி முடிவு செய்தீர்கள்? ஒருவருக்கு அரை டம்ளர் வீதம், இருவருக்கு ஒரு டம்ளர் என்று அளவு எடுக்கும்போது, மூவருக்கு ஒன்றரை டம்ளர். இதைத்தான் பள்ளியில் நமக்கு அல்ஜிப்ரா என்ற பெயரில் சொல்லிக் கொடுத்தார்கள். ஆனால் இப்படி எளிமையாகச் சொல்ல முடிந்திருக்கக்கூடிய விஷயத்தை X, Y என்று சொல்லிக் கொடுக்கப்பட்டதால் நாமும், அல்ஜிப்ரா, வாழ்க்கையில் எங்குமே பயன்படவில்லை என்று நம்பிக் கொண்டிருக்கிறோம். எளிய முறையில் கணிதத்தை எப்படிக் கற்றுத் தருவது என்பதைச் சிந்திப்பதில் ஆசிரியர்களின் நேர்த்தியான உழைப்பும் அடங்கியிருக்கிறது.

உழைப்பைப் பார்க்கட்டும்!

உங்கள் பிள்ளைகளுக்கு அவர்கள் விரும்பிய பொருட்களை நீங்கள் வாங்கிக் கொடுக்கிறீர்கள். அதற்குப் பணம் தேவைப்படுகிறது. அதற்காக எவ்வளவு கடுமையாக உழைக்கவும் நீங்கள் தயாராகி விடுகிறீர்கள். ஆனால், அந்தப் பணத்தைச் சம்பாதித்ததற்கு நீங்கள் எவ்வளவு பாடுபட வேண்டியிருந்தது என்று உங்கள் குழந்தைக்குத் தெரியவேண்டாமோ? அது தெரியாமல் போய்விட்டால், உழைப்பின் அருமையும் உங்களின் அருமையும் உங்கள் வாரிசுக்குத் தெரியாமலேயே போய்விடும் ஆபத்து இருக்கிறதல்லவா!

நீங்களும் உங்கள் பிள்ளைகளும் அனுபவிக்கிற எல்லா வசதிகளின் பின்னாலும் கடுமையான உழைப்பு இருக்கிறது என்று, அவர்களுக்கு நீங்கள் நிச்சயம் சொல்லித்தர வேண்டும். அதற்கு என்ன செய்வது என்கிறீர்களா? உங்கள் பணியிடத்துக்கு (அலுவலகத்துக்கு) அவர்களை அழைத்துச்சென்று காட்டலாம். ‘அப்பா / அம்மா இப்படியெல்லாம் கஷ்டப்பட்டு உழைத்துதான் உங்களுக்காகச் சம்பாதிக்கிறேன்’ என்று சொல்லுங்கள். உழைப்பின்மீதும் உங்களின்மீதும் அவர்களுக்கு மரியாதை வந்துவிடும். கூடவே, இப்படியெல்லாம் படாத பாடுபட்டு சம்பாதித்த பணத்தை எப்படி சிக்கனமாகச் செலவழிப்பது என்ற பாடத்தையும் நீங்கள் சொல்லித்தராமலேயே அவர்கள் கற்றுக்கொள்வார்கள்.

எல்லாமே உழைப்புதான்!

இன்னும் கணவர் வேலைக்குச் சென்றுவர, மனைவி குடும்பத்தைப் பார்த்துக்கொள்வது என்ற அடிப்படையில் இயங்கும் குடும்பங்கள் நம் ஊரில்அதிகம். அப்படிப்பட்ட ஒரு வீட்டுக்குச் சென்று,

“உங்க அப்பா என்ன பண்றார்?” என்று ஒரு குழந்தையிடம் கேட்டால்,

“ஆபீஸ்ல வேலை செய்றார்” என்று பதில் சொல்லும்.

அதே நேரத்தில், “உங்க அம்மா என்ன செய்றாங்க?” என்று கேட்டால்,

“வீட்ல சும்மாத்தான் இருக்காங்க” என்று பதில் சொல்லும். குடும்பத் தலைவரும் அதையே பதிலாகச் சொல்லக்கூடும். ஆனால், உண்மையில் இல்லத்தரசிகள் வீட்டில் சும்மாவா இருக்கிறார்கள்? இல்லையே!

சமையல், வீட்டைச் சுத்தமாக நிர்வகிப்பது, பொருளாதார திட்டமிடல், உறவு மேலாண்மை, குடும்ப உறுப்பினர்களைப் பேணுவது என்று அவர்கள் எவ்வளவு பணிகளைச் செய்கிறார்கள்! அதற்கு எவ்வளவு உழைப்பு தேவைப்படுகிறது? அந்த உழைப்பு, குடும்பத் தலைவரால் மதிக்கப்பட வேண்டும். தாயாகிய இல்லத்தரசி எவ்வளவு உழைப்பைச் செலுத்தி ஒரு குடும்பத்தை உருவாக்குகிறாள் என்பதை, குழந்தைகளுக்கு பெற்றோர் அவசியம் கற்றுத்தர வேண்டும். உழைப்பு வெளிப்படையாகத் தெரியாவிட்டாலும் அதனை இனம் கண்டு அங்கீகரிக்க வேண்டும் என்கிற செய்தி, அவர்களுக்குச் சென்றாக வேண்டும்.

உழைப்பே உயர்வு தரும்!

இன்றைய காலகட்டத்தில் – குருட்டு அதிர்ஷ்டம், ஏமாற்று,  சூதாட்டத்தால் ஒருவன் உயர்ந்த நிலையை அடையலாம் என்ற கருத்து பொதுமக்கள் மத்தியில் பரப்பப்பட்டு வருகிறது. ஊடகங்களில்கூட இதுபோன்ற விஷயங்கள் நகைச்சுவையாகவும் சில நேரங்களில் சீரியஸாகவும் பரப்பப்படுகின்றன. ஆனால், உண்மையும் உழைப்பும் மட்டும்தான் நிரந்தரமானவை என்பதை பெற்றோர்தான் குழந்தைகளுக்குக் கற்றுத்தர வேண்டும். சர்வதேச அளவில் உழைப்பைக் கொண்டாடுகிற மே தினத்திலாவது இதைத் தொடங்கிவிட வேண்டும்.

——————————————————————-

(நன்றி:- மே 2015, செல்லமே)

Posted in கட்டுரை, குழந்தை வளர்ப்பு | Tagged , , , , | Leave a comment

சுத்தம் சொல்லிக் கொடுங்க!

சுத்தம் சோறு போடும்!

“ அப்ப குழம்பு எது ஊத்தும்?”னு வேடிக்கையா கேட்குறது நம்மில் பல ஆளுங்க வழக்கம். ஆனால் உலகம் முழுவதும் ஆண்டுக்கு 29 லட்சம் குழந்தைகள் சுகாதாரமின்மையால் இறந்து போகின்றனர் என்று ஒரு புள்ளி விபரம் சொல்கிறது. இதில் ஐந்து லட்சம் பேர் இந்தியக் குழந்தைகளாம்!

பதினைந்து வயது வரையிலான சிறார்களுக்கு அடிக்கடி உடல்நலக் குறைவு ஏற்படக் காரணம் சுகாதாரமின்மையே என்று உலக சுகாதார நிறுவனம் ஒர் அறிக்கையில் சொல்கிறது. இன்று பள்ளி செல்லும் குழந்தைகளுக்கு அடிக்கடி உண்டாகும் தொண்டைப்புண், அதனால் ஏற்படும் ஜலதோஷம், இருமல் மற்றும் வயிற்றுப்போக்கு, வாந்தி, மயக்கம், குடல்புண் போன்ற பல நோய்களுக்கு அடிப்படைக் காரணமே, பிள்ளைகள் தங்களின் கைகளைச் சுத்தமாக வைத்துக் கொள்ளாததுதான் என்றும் கண்டுபிடித்திருக்கிறார்கள். முறையாக கைகளைக் கழுவாதபோது, நகங்களின் இடுக்குகளில் நோய் பரப்பும் கிருமிகள் ஒட்டிக்கொள்கின்றன. பின்னர் உணவருந்தும்போது அக்கிருமிகள் உட்சென்று குடலில் பல்கிப் பெருகி நோயைத் தோற்றுவிக்கின்றனவாம்.

சிறு குழந்தைக்கு உணவு ஊட்டும் பல தாய்மார்கள் தங்களின் கையைக் கழுவிய பின்னர்தான் உணவு கொடுக்கின்றனர்.அதேசமயம், குழந்தை எடுத்துச் சாப்பிடட்டும் என்று எதையாவது தட்டில் வைத்துக் கொடுக்கும்போது, குழந்தையின் கையைக் கழுவி விடுவதில்லை. கண்ட இடங்களிலும் கைவைத்து விளையாடும் குழந்தை, அதே அழுக்குக் கையோடு உணவை எடுத்து சாப்பிடும். விளைவு.. உடல்நலக் குறைவுதான்!

இங்கே பலரும் சிறுநீர் கழித்துவிட்டு வந்தால், கை கழுவும் பழக்கம் இல்லாதவர்களாகவே இருக்கிறார்கள். பல வீடுகளில் கை கழுவுவதற்கு என்று சோப்பு ஏதும் தனியாக வைப்பதில்லை. கை கழுவுகின்ற அதே சோப்பைத்தான் முகம் கழுவவும் பயன்படுத்துகிறார்கள். அடைக்கப்பட்ட பாத்ரூமை விட, குளுகுளுன்னு காத்தடிக்கும் திறந்தவெளிதான் நல்லதுன்னு நினைக்கிற மக்கள் நம்ம நாட்டுல இன்னும் அதிகம். அதிகாலை நேரங்களில் இப்படி திறந்தவெளி தேடி அலைகின்றவர்களை நம் தேசம் முழுவதும் பார்க்க முடியும்.

பல பள்ளிகளின் நிலை இன்னும் மோசம். அங்கேயும் இதே நிலைதான் என்றாலும், மாணவர்கள் கழிவறைகள் சுத்தமாக இருப்பதில்லை. அரசாங்கப் பள்ளியாக இருந்தால் கழிவறைகளே கேள்விக்குறிதான்! நன்றாகப் பாடம் சொல்லிக் கொடுப்பார்களா என்று பள்ளிகளைத் தேடித்தேடி பிள்ளைகளை அனுப்பும் பெற்றோர். அப்பள்ளிகளின் கழிவறை வசதிகள் எப்படி இருக்கின்றன என்று ஓர் எட்டு எட்டிப் பார்க்கலாம் அல்லது, பெற்றோர் ஆசிரியர் மீட்டிங் நடக்கும் சமயங்களில் கழிவறைப்பக்கம் போய் எட்டிப் பார்க்கலாம். பாடங்களை மனப்பாடம் செய்து மதிப்பெண் எடுக்க வைப்பதற்கு மட்டுமா பள்ளிகள் என்பதை நாம்தான் சிந்தித்துப் பார்க்கவேண்டும். சுத்தமும் சுகாதாரமும் அடிப்படைத் தேவைகள். அதை சின்ன வயதிலிருந்தே பழக்கப்படுத்திக் கொள்ளவேண்டும். அப்போதுதான் அனிச்சைச் செயலாக அது நடைபெறும். இல்லையெனில் அதுவும்கூட, பிள்ளைகளுக்குச் சுமையானதாகத் தோன்ற வாய்ப்புள்ளது.

காலை எழுந்ததும் பல் துலக்குவதையும், குளிப்பதையும் தினம் செய்யவேண்டும் என்று போதிக்கும் நாம், பிள்ளைகள் கைகளை அடிக்கடி கழுவவேண்டும் என்பதோடு, நாள் முழுக்க எப்படி சுத்தமாகவும் சுகாதாரமாகவும் இருக்கவேண்டும் என்பதை நாம்தான் வலியுறுத்திச் சொல்லவேண்டும். அவர்களுக்குச் சொல்லும்முன் பெற்றோராகிய நாம் அதைப் பின்பற்ற வேண்டும். அப்போதுதான் பிள்ளைகளும் நம்மைப் பார்த்து கற்றுக்கொள்வார்கள். இல்லையெனில் தங்களுக்குக் கொடுக்கப்படும் இன்னொரு வேலையாகவோ சுமையாகவோ பிள்ளைகள் நினைத்துவிட வாய்ப்பு உண்டு.

 

சுத்தமாக இருக்க சில டிப்ஸ்..

* வெளியில் எங்கே தெரியப்போகிறது என்ற நினைப்பில், உள்ளாடைகளை ஒரு நாளுக்கு மேல் அணிவிக்காதீர்கள்.

* கோடைக் காலத்தில் பிள்ளைகளின் ஆடைகளை (உள்ளாடைகள் உட்பட) இரண்டு முறை மாற்றுங்கள்.

* காலையில் படுக்கையிலிருந்து எழுந்தவுடன் அப்படியே பல் துலக்கப் போகாமல், முதலில் கையும் முகமும் கழுவியபின் பிரஷை கையில் எடுப்பது நல்லது.

* சிறுநீர், மலம் கழித்தபின் உங்கள் குழந்தை சோப்பு போட்டு கைகளைக் கண்டிப்பாகக் கழுவ வேண்டும்.

* பள்ளி முடித்தோ பணி முடித்தோ – எந்த வேலை முடித்து முதலில் வீட்டுக்கு வந்தாலும், முதலில் சுத்தமாக கை கால்களைக் கழுவுதல் வேண்டும்.

* சமைப்பதற்கு முன்பும் பின்பும்கூட, சமைப்பவர் கைகளைக் கழுவுவது நல்லது.

* பெற்றோர், வாகனம் ஓட்டி வந்த பின்பு, உடனே கை கழுவுதல் நல்லது.

* குழந்தைகளுக்கு எந்த ஒரு உணவு கொடுப்பதற்கு முன்பும், அவர்களது கைகளை நன்கு சுத்தமாகக் கழுவிய பின்பே கொடுக்க வேண்டும். இந்தப் பழக்கத்தை அவர்கள் சீராகக் கடைபிடிக்கும்படி செய்ய வேண்டும்.

* கைகளை அவசர அவசரமாக 2-3 வினாடிகளில் கழுவக் கூடாது. குறைந்தது 30 வினாடியாவது கை கழுவுவதற்கு எடுத்துக்கொள்ள வேண்டும்.

* அதிக ரசாயனம் கலந்த சோப்புகள், க்ரீம்களை குழந்தைகளுக்குத் தராதீர்கள்.

* கைகளை நன்கு தேய்த்துக் கழுவ வேண்டும். நக இடுக்குகளில் தண்ணீர் விட்டு கழுவ வேண்டும். இந்த முறைகளைக் கடைபிடித்து வந்தாலே, நோய்கள் நெருங்குவதற்கான வாய்ப்பை பாதி வழியிலேயே அடைத்து விடலாம்.

(நன்றி- செல்லமே, மே 2015)

 

 

Posted in கட்டுரை, குழந்தை வளர்ப்பு | Tagged , , , , | Leave a comment

ஐந்திலேயே வளையட்டும்!

ட்டுரைக்குள் செல்லும்முன் கொஞ்சம் கொசுவர்த்தியைச் சுற்றிக்கொள்ளுங்கள். சில ஆண்டுகளுக்குமுன், பள்ளி விட்டு வீட்டுக்கு வரும் பிள்ளை, பள்ளிப்பையைத் தூக்கி எறிந்துவிட்டு நண்பர்களோடு விளையாட, தெருவில் இறங்கி ஓடிவிடுவான். அவனை வீட்டுக்குள் கொண்டுவந்து சாப்பிட வைப்பதற்குள் போதும் போதும் என்றாகிவிடும். பள்ளியின் வகுப்பறையிலும், வீட்டுப்பாடம் செய்யும்போதும் மட்டும்தான் ஒரே இடத்தில் அன்றைய பிள்ளைகள் இருப்பார்கள். (நீங்கள் மட்டும் உங்களின் சிறுவயதில் எப்படி இருந்தீர்களாம்?)

இப்போது இன்றைய பிள்ளைகளை, கொஞ்சம் கவனியுங்கள். காலையில் எழுந்து பள்ளிக்குச் சென்றுவிட்டு மதியத்திற்கு மேல் இல்லம் வரும் குழந்தைகள், அவசர அவசரமாக எதையாவதை அள்ளிப் போட்டுக்கொண்டு ஸ்பெஷல் வகுப்புகளுக்கோ, டியூசன் சென்டர் நோக்கியோ அல்லது ஏதாவது பாட்டு, நடனம், ஓவியம் என்ற கலை வகுப்புகளுக்கோ பறக்கிறார்கள். மாலை வீட்டுக்கு வந்த்தும், கொஞ்சநேரம் டீவி அல்லது வீடியோ கேம்ஸ், பின்னர் வீட்டுப் பாடம், இரவு உணவு, உறக்கம் என அன்றைய தினம் முடிந்துபோகிறது. மறுநாள் எழுந்ததும் அதே ஓட்டம்தான். விளைவு?! ஒபிசிட்டி எனப்படுகின்ற உடற்பருமன், இன்றைய இளம் தலைமுறையினரிடையே அதிகரித்து வருவது கண்கூடு.

வெளியே போய் விளையாட மாட்டானா(ளா) என்று பெற்றோர் ஏங்கும் நிலையில்தான், இன்றைய பிள்ளைகள் வீட்டுக்குள்ளேயே முடங்கிக் கிடக்கிறார்கள். இதனால் பல்வேறு பிரச்சனைகளை பிள்ளைகள் எதிர்கொள்ள வேண்டியிருக்கிறது. உடற்பருமன் காரணமாக உடற்சோர்வு ஏற்படுகிறது. உடற்சோர்வு காரணமாக எப்போதும் தூங்கி வழியவேண்டி வருகிறது. இதன் காரணமாக, பாடங்களைச் சரிவர கவனிக்க முடியாமல் போகிறது. நினைவாற்றலை உடல் சோர்வு எடுத்துக்கொண்டு விடுகிறது. இப்படி நிறைய சொல்லிக்கொண்டே போகலாம்.

தினமும் தேவை உடற்பயிற்சி

உடற்பயிற்சி என்றதுமே நூறு தண்டால் பஸ்கி எடுப்பதும், அதிகாலையில் எழுந்து, தெரு நாய்கள் துரத்திவர, பக்கத்து ஊர் வரைக்கும் ஓடுவதுபோல எல்லாம் கற்பனை செய்துகொள்ள வேண்டாம்.

வீட்டில் இருந்து அடுத்த தெருவில் இருக்கும் பலசரக்கு கடையில் போய் பொருட்கள் வாங்கி வருவதையோ, பால் வாங்கி வருவதையோ அல்லது இஸ்திரிக்கு துணி கொடுக்க நடந்து போவதையோ கூட உடற்பயிற்சியில் சேர்த்துக்கொள்ளலாம். வீட்டு வாசலிலோ, பக்கத்திலிருக்கும் விளையாட்டு மைதானத்திலோ இறகுப் பந்து (ஷட்டில் காக்) விளையாடுவதும்கூட நல்ல உடற்பயிற்சிதான். ஆனால், இவற்றைத் தனியாக பிள்ளைகள் தொடக்கத்தில் செய்ய மாட்டார்கள் என்பதால், கொஞ்ச நாட்களுக்கு பெற்றோர் அவர்களை அழைத்துச் செல்லலாம்.

அதேபோல சின்னச்சின்ன வேலைகளுக்கு வீட்டில் இருக்கும் வாகனங்களை எடுக்காமல் நடக்கப் பழகிக்கொண்டால், நடை என்பது சுமையாக பிள்ளைகளுக்குத் தெரியாது. பின்னர் நடைப்பயிற்சி, ஓட்டப்பயிற்சி ஆகியவற்றைத் தொடரலாம். தினமும் நடைப்பயிற்சியும் ஓட்டப்பயிற்சியும் செய்வதால், நோய் எதிர்ப்பு சக்தி அதிகரிக்கிறது. இதனால் சளி பிடிப்பது குறையும்.

பள்ளிகளில், விளையாட்டு வகுப்புகளில் ஆர்வத்தோடு உங்கள் பிள்ளை பங்குபெறுகிறானா என்று பள்ளியில் விசாரியுங்கள். ஏதாவது ஒரு விளையாட்டிலாவது அவனது / அவளது ஆர்வம் இருக்க வேண்டும். அப்போது ஒரு புத்தகத்தை எடுத்து வைத்துக்கொண்டும், விளையாடும் சக நண்பர்களை வேடிக்கை பார்த்துக் கொண்டிருப்பதும் நல்ல அறிகுறியல்ல! நோய் பீடித்த மனோபாவம். படிக்க வேண்டிய நேரத்தில் படிப்பதும், விளையாட வேண்டிய நேரத்தில் விளையாடுவதும்தான் இயற்கையானது.

தண்டனை அல்ல!

உடற்பயிற்சியை ஏதோ தண்டனை போல இன்றைய பிள்ளைகள் பலரும் நினைக்கக் காரணம், அவர்தம் பெற்றோரே! அவர்கள் எவ்வித உடற்பயிற்சியையும் மேற்கொள்ளாமல் பிள்ளைகளை மட்டும் உடற்பயிற்சி செய்யச் சொல்லும்போது, பாடங்களைப் படிப்பது மாதிரியே உடற்பயிற்சியையும்கூட அவர்கள் பெரும் தண்டனையாகக் கருதும் வாய்ப்புகள் அதிகம். அதனால், தொடக்கத்தில் நீங்களும்கூட பிள்ளைகளுடன் சேர்ந்து உடற்பயிற்சி செய்வது அவசியம் என்பதை நினைவில் வைத்துக்கொள்ளுங்கள்.

 என்னென்ன நன்மைகள் கிடைக்கும்?

விளையாட்டின் வழி உடற்பயிற்சிகளை மேற்கொள்ள முடியும். இதற்கு, தகுந்த நிபுணர்கள் இருக்கிறார்கள். அவர்களின் ஆலோசனையைப் பெறலாம். தினமும் உடற்பயிற்சிகள் செய்வதினால் ஏற்படும் நன்மைகளைப் பட்டியலிட்டால், அது நீண்டுகொண்டே போகும். அதேசமயம் உடற்பயிற்சி தொடங்கிய மறுநாளே இந்நன்மைகள் எல்லாம் வந்து சேர்ந்துவிடும் என்பதில்லை. தொடர்ந்து செய்வதினால் மட்டுமே பலனை அடையமுடியும் என்பதை பெற்றோர் உணர்ந்து, பிள்ளைகளுக்குச் சொல்லிக் கொடுக்கவேண்டும்.

 

உடற்பயிற்சி கொடுக்கும் உற்சாகம்

  1. எவ்வகையான உடற்பயிற்சியாக இருந்தாலும், தினமும் செய்து வந்தால் நோய் எதிர்ப்பு சக்தி அதிகரிக்கிறது.
  2. குழந்தைகளைத் தாக்கும் டைப் 2 சர்க்கரை நோய் வராது,
  3. இரத்த அழுத்தம், கொழுப்பு எல்லாம் கட்டுப்பாட்டில் இருக்கும்,
  4. இதயம், நுரையீரல் பலப்படும். இதனால் பிற்காலத்தில் இதய நோய் வரும் வாய்ப்பு குறைகிறது.
  5. இன்றைய உணவுப் பழக்கத்தின் காரணமாக ஏற்படும் உடல் பருமன் கட்டுப்பாட்டில் இருக்கும்.
  6. எலும்பு அமைப்புகள், தசை அமைப்புகள் பலப்படும்.
  7. இரத்த ஓட்டம் சீராகும்- இதனால் மூளைக்குச் செல்லும் ஆக்சிஜன் அதிகமாகக் கிடைக்கிறது. இதனால் மொத்த உடலும் சுறுசுறுப்படைகிறது.
  8. உடல் உறுப்புகளின் ஒத்திசைவு நன்றாக இருக்கும், ஆற்றலும் அதிகரிக்கும்.
  9. பதற்றம், மன அழுத்தம் குறையும். இதனால், பாடங்களையும் நன்றாகப் படிக்க முடியும்.
  10. தொடர்ந்து உடற்பயிற்சி செய்வதால், உடல் சோர்வு இருக்கும். எனவே, இரவு உறக்கம் நன்றாக இருக்கும். உறக்கம் நன்றாக இருப்பதால், காலையில் புத்துணர்வுடன் இருப்பார்கள்.

உடற்பயிற்சிகளை இளம் வயதிலேயே பழக்கப்படுத்தி விடுவதால், பிள்ளைகள் வளர்ந்து பதின் பருவத்திலும், இளைஞர் பருவத்திலும்கூட இப்பழக்கம் தொடரும். ஐம்பதில் வளைய வேண்டுமென்றால், ஐந்தில் வளைந்த அனுபவமும் வேண்டுமல்லவா!

 

(நன்றி:- 2015 மே, செல்லமே )

Posted in கட்டுரை, குழந்தை வளர்ப்பு | Tagged , , , , | Leave a comment

கிட்டப்பார்வைக்கு என்ன லென்ஸ்?

ஞாபக மறதி என்பது, எல்லோருக்கும் பொதுவான ஒன்றுதான். அதனால் உங்கள் வீட்டுப்பிள்ளையும் அப்படி இருந்தால், பெரிதாக அலட்டிக்கொள்ள வேண்டியதில்லை. சிறுவயது விஷயங்களைப் படம்பிடித்தாற்போல நினைவுபடுத்திச் சொல்லி அசத்துபவர்களை, தினசரி வாழ்க்கையில் பார்க்கிறோம். ஆனால் நேற்று நிகழ்ந்த ஒரு சம்பவத்தை, சிலருக்கு நினைவுபடுத்தினாலும்கூட ஞாபகம் வராது. ‘சித்திரமும் கைப்பழக்கம் செந்தமிழும் நாப்பழக்கம்’ என்பது போலவே நினைவாற்றலைப் பெருக்கிக்கொள்ள, அதற்கான பயிற்சிகள் குழந்தைகளுக்குப் பெரிதும் துணை நிற்கும். ஒரு கதை சொல்லுவார்கள்.

ஒரு ஊரில் ஓர் இளைஞன், ‘‘தன்னுடைய பசுமாட்டை குழந்தையைத் தூக்குவதுபோல யாராவது தூக்க முடியுமா?’’ என்று சவால் விட்டான். அந்த ஊரில், யாராலும் அதைச் செய்ய முடியவில்லை. “எங்களைக் கேட்கிறாயே! உன்னால் தூக்க முடியுமா? நீ தூக்கினால், நாங்கள் பரிசு தருகிறோம்!” என்றனர் ஊர் மக்கள். அந்த இளைஞனும் தனது மாட்டைத் தூக்கிக்கொண்டு ஊரையே வலம் வந்தானாம்! ஊரில் எல்லோருக்கும் வியப்பான வியப்பு! “இவ்வளவு பெரிய மாட்டை எப்படி அநாயாசமாகத் தூக்கிக்கொண்டு நடக்கிறீர்கள்?” என்று கேள்விகளால் அவனைத் துளைத்து எடுத்தனர். “இந்த மாடு கன்றுக்குட்டியாக இருக்கும்போதிலிருந்து, தினமும் தூக்கி கொஞ்ச தூரம் நடப்பேன். அதனால், எனக்கு மாட்டின் எடை ஒருபோதும் சுமையாகத் தெரிந்ததில்லை. இப்படி, தினம் நடந்து நடந்து பழகிக்கொண்டேன். அவ்வளவுதான்!” என்றான் அந்த இளைஞன்.

குழந்தைகளின் ஞாபக சக்தி என்பதும் இப்படித்தான்! நினைவில் இருத்திக் கொள்வதற்கான பயிற்சிகளைத் தொடர்ந்து செய்துவந்தால், ஞாபக சக்தி அதிகரிக்கும். பலகாலமாக நம் முன்னோர், இதற்கான செயல்களை பல வழிகளில் கடைபிடித்து வருகின்றனர்.

‘மொட்டை உரு’ என்பார்களே! அப்படி வெறும் மனப்பாடம் செய்வதைவிட பாடங்களைப் புரிந்துகொண்டு படித்தால், அது என்றைக்கும் மறக்காது என்பது முன்னோர்களின் வழிகளில் ஒன்று. உதாரணமாக, கண்ணில் ஏற்படும் பார்வை குறைபாட்டுக்கு கண்ணாடி அணிவது வழக்கம். கிட்டப்பார்வை, தூரப்பார்வை என்று சொல்லப்படும் இக்குறைபாடுகளுக்கு குவி லென்ஸ், குழி லென்ஸ் என்ற லென்ஸ்களைப் பயன்படுத்துவார்கள். ஆனால், எதற்கு எந்த லென்ஸ் அணியவேண்டும் என்பது நம்மில் பலருக்கும் நினைவில் இருப்பதில்லை. ஆனால், எல்லோரும் பள்ளிப்பருவத்திலேயே இதைப் படித்து, தேர்விலும்கூட எழுதி இருப்போம். ஆனால் நினைவில் இல்லாமல் போனதற்கு, நாம் அதை மனப்பாடம் செய்து படித்ததுதான் காரணமாக இருக்கும். இதற்கு இன்னது என்று மனப்பாடம் செய்வதைவிட உதாரணங்கள் மூலம் எளிமையாகச் சொல்லிக் கொடுக்கப்பட்டால், அவை என்றும் மறவாமல் இருக்கும்.

இதை எப்படி எளிமையாகச் சொல்லுவது என்று கேட்கிறீர்களா? ‘கிட்டக் குழி வெட்டி, தூரக் குவி’ என்று சொல்லுவார்கள். குழி வெட்டும்போது அதிலிருந்து கிடைக்கும் மணலை அருகிலேயே வைத்திருந்தால் மீண்டும் குழிக்குள் விழுந்துவிடும் என்பதால், தூரம் சென்று கொட்டு என்பதாகப் பொருள்படும் இவ்வார்த்தையின் பின்னால் ஒளிந்திருப்பது, கண் பார்வை குறைபாட்டிற்கு என்ன வகை லென்ஸ் பயன்படுத்த வேண்டும் என்ற அறிவியல் செய்தி! கிட்டப்பார்வைக்கு குழி லென்ஸும், தூரப்பார்வைக்கு குவி லென்ஸும் என்பதுதான் அந்தச் செய்தி!

பிள்ளைகளுக்குக் கற்பிக்கின்ற பாடங்களை, அவர்கள் புரிந்துகொள்கின்ற மாதிரி சொல்லிக்கொடுத்தால் எப்பவுமே மறந்து போகாது. மேலும், பாடங்களை வாய்விட்டுப் படிப்பது, புரிந்து படிப்பது, படித்தவற்றை எழுதிப் பார்ப்பது ஆகியவை மூலமும் நினைவில் நிறுத்தலாம். அவை ஒருபோதும் மறக்காது.

பள்ளிப்பிள்ளைகளுக்கு பாடம்தான் பிரச்சனை என்றில்லை, வீட்டில்கூட ஒரு பொருளை எடுத்துப் பயன்படுத்திவிட்டு, அதை வேறு ஒரு இடத்தில் வைத்துவிட்டு ஒருநாள் முழுக்க தேடிக்கொண்டிருப்பார்கள். குறிப்பாக, வார இறுதி நாட்களில் வீட்டுப்பாட நோட்டுப் புத்தகங்களை எங்கோ வைத்துவிட்டு, திங்கட்கிழமை காலை பள்ளி செல்லும் அவசரத்தில் வீடே அல்லோகல்லோலப்படும். “என் பென்சிலைப் பார்த்தியா?; கணக்கு நோட்டை இங்கேதானே வச்சேன்!; வாட்டர் கேன் மூடி எங்கே போச்சு?” என்று, வீட்டையே புரட்டிப் போட்டுக்கொண்டிருப்பார்கள்.

இதுபோன்ற பிரச்சனைகளை வேறு கோணத்தில் அணுகித் தீர்க்கலாம். நம் வீட்டில், டீவி ரிமோட் கன்ட்ரோலை குளியலறையில் வைப்போமா? மாட்டோம் இல்லையா! அதேபோல, குழந்தைகளுக்கு, அந்தந்தப் பொருட்களை அங்கங்குதான் வைக்க வேண்டும் என்ற ஒழுங்கைக் கொண்டு வந்துவிட வேண்டும். எடுத்துக்காட்டாக, ‘இரவு 8 மணிக்கு வீட்டுப்பாடங்களை முடித்துவிட வேண்டும்; 8.05-க்கு பென்சில்களை சீவி வைத்துவிட வேண்டும்; 8.10-க்குள் பள்ளிக்குக் கொண்டுசெல்லும் பையில் பென்சில், பேனா, நோட்டுப் புத்தகங்களை வைத்துவிட வேண்டும்’ என்றெல்லாம் சுயமாகவே விதிகளை உருவாக்கி வைத்துவிட்டால், அந்த ஒழுங்குக்கு குழந்தைகளும் பழகிவிடுவர். நினைவாற்றல் பிரச்சனையும் எழ வாய்ப்பில்லை.

“மறதி என்பது, பயிற்சியினால் சரிசெய்யக் கூடியதுதான்” என்கிறார், மாணவ உளவியல் நிபுணரான திருமதி. நளினி சந்திரசேகரன். “மறதி என்பது, எல்லோருக்கும் பொதுவானதுதான். முதலில், ஞாபகக் குறைபாடு இருக்கும் எந்தப் பிள்ளையையும், அவர்களின் குறையைச் சொல்லி இழிவுபடுத்தக் கூடாது. இது மாணவர்களை அதிகம் பாதிக்காமல் இருக்கவேண்டும் என்றால், பெற்றோர் தினமும் சண்டை சச்சரவுடன் இருக்கக் கூடாது. குழந்தைகளைச்சுற்றி எப்போதும் அமைதியான நல்ல சூழல் இருக்கவேண்டும். எதையுமே அவர்கள் புரிந்துகொண்டு உள்வாங்கினால் மட்டுமே, என்றைக்குமே நினைவில் இருக்கும். இல்லாவிட்டால், விருப்பமின்றி பெறும் தகவல்களாக உள்ளே போகும். அதுவும் சில நாட்களில், மறந்தும் போய்விடும்.

ஞாபகங்களில் தடுமாறும் பிள்ளைகளுக்கு, பாடங்களைப் பகுதி பகுதியாகப் பிரித்து படிக்கச் சொல்லித்தர வேண்டும். மொத்தமாக சுமை ஏற்றக் கூடாது. அவர்களுக்கு  எதுவுமே புரியாமல் போய்விடும். புரியாததை ஏன் நினைவில் கொள்ளப் போகிறார்கள்?

அடுத்ததாக, உணவு முக்கியப் பங்கு வகிக்கிறது. நினைவாற்றலை வளர்க்க பாதாம் பருப்பு, பேரிச்சை மற்றும் உலர் பழங்கள் கொடுக்கலாம். கீரை வகைகளையும் சேர்த்துக்கொள்வது பயன் தரும். இன்னொரு முக்கியமான விஷயம். ஞாபக மறதி இருப்பவர்களுக்கு, அதைச் சரி செய்வதற்கான சிறப்புப் பயிற்சிகள் இருக்கின்றன. மருத்துவர்களைக் கலந்தாலோசித்தால் அவர்கள் வழிகாட்டுவார்கள்” என்கிறார் நளினி.

இரண்டு பத்து ரூபாயை பிள்ளை கையில் கொடுத்து, முட்டையும் பாலும் வாங்கிவரச் சொல்லுகிறீர்கள். கடை வரைக்கும் சென்றுவிட்டு, “எந்தப் பத்து ரூபாய்க்கு பால்?; எந்தப் பத்து ரூபாய்க்கு முட்டை?” என்று பையன் திரும்பி வந்தால், கோபப்படாமல் அணுகுங்கள். அவர்களின் வாழ்க்கை நன்றாக இருக்கும்.

உணவில் சில டிப்ஸ்

  • மிளகை எடுத்து நன்றாக இடித்துப் பொடி செய்து தேனில் தூவி சாப்பிட்டு வந்தால், மறதி குறைந்து நினைவாற்றல் அதிகரிக்கும்.
  • தினமும் பப்பாளி, மாதுளம்பழம் சாப்பிடுவதும் ஞாபக சக்தி பெருக உதவும்.
  • பீர்க்கங்காய் வேரை கஷாயம் செய்து சாப்பிட்டு வந்தால், மூளை பலம் பெறுவதுடன் ஞாபக சக்தியும் அதிகரிக்கும்.
  • பாதாம் பருப்பு, வெண்டைக்காய், உருளைக்கிழங்கு, தக்காளி இலை ஆகியவற்றை தினமும் உணவில் சேர்த்து சாப்பிட்டு வந்தால், நினைவாற்றல் கூடும்.
  • செம்பருத்திப் பூவில் உள்ள மகரந்தக் காம்பை நீக்கிவிட்டு சாப்பிட, நினைவாற்றல் அதிகரிக்கும்.
  • முளைக் கீரை, வல்லாரைக் கீரை ஆகியவை நினைவாற்றலுக்கு நல்லவை. .
  • துளசி இலை நான்கினை எடுத்து தினசரி சாப்பிட, நினைவாற்றல் அதிகரிக்கும்.
  • தூதுவளைக் கீரையை அடிக்கடி உணவில் சேர்த்து வந்தாலும், ஞாபகசக்தி பெருகும்.
  • ————————————-

(செல்லமே ஜூன்2015)

Posted in கட்டுரை, குழந்தை வளர்ப்பு | Tagged , , , , , , | 2 Comments

அட்வைஸ் பண்ணி அறுக்காதீங்க..!

 

ன்றைய தேதியில் குழந்தைகளை வைத்துப் பட்டிமன்றம் நடத்தினால், அதற்கு அவர்கள் தேர்வு செய்யும் பொருத்தமான தலைப்பு என்னவாக இருக்கும் தெரியுமா? ‘அதிகமாக அட்வைஸ் பண்ணுவது அம்மாவா அப்பாவா?’ என்பதைத்தான் தேர்வு செய்வார்கள். அந்த அளவுக்கு அட்வைஸ் என்ற குளம் வெட்டி, குழந்தைகளை அதில் அமிழ்த்தி எடுத்துக் கொண்டிருக்கிறோம். அறிவுரைகளினாலேயே பல வீடுகளில் பிள்ளைகளின் பார்வைக்குப் பெற்றோர் எதிரிகளாகத் தெரிகிறார்கள்.

உலகில் எல்லோரும் அடுத்தவருக்கு இலவசமாக அள்ளித்தருவது அட்வைஸ்தான். ஆனால், நாமும் அந்த அறிவுரைகளின்படியே நடந்திருக்கிறோமா என்பதை எவரும் நினைத்துப் பார்ப்பதில்லை.

கதை ஒன்று சொல்லுவார்கள். நீங்களும்கூட அறிந்திருக்கலாம். ‘‘எப்போது பார்த்தாலும் என் பிள்ளை இனிப்பு அதிகம் சாப்பிடுகிறான்’’ என்ற புகாருடன் தன் மகனை துறவி ஒருவரிடம் அறிமுகப்படுத்தினார் ஒரு பெண்மணி. எட்டில் இருந்து பத்து வயதிருக்கும் அவனுக்கு. துறவி, இருவரையும் பார்த்தார். பின், “நான் என்ன செய்யவேண்டும்?” என்று கேட்டார். “என்ன சாமி, இப்படிக் கேட்கிறீர்கள்? நீங்கள் ஏதாவது புத்திமதி சொல்லி, அவனை இனிப்பு உண்பதில் இருந்து விடுவிக்க வேண்டும்” என்றார் அப்பெண்மணி. சிறிது யோசித்த துறவி, ஒரு வாரம் கழித்து வரச்சொன்னார். அப்பெண்மணியும் சரியென திரும்பிப் போனார்.

ஒரு வாரம் கழித்து, திரும்பவும் துறவியைக் காண வந்தார் அப்பெண்மணி. இப்போது துறவி அப்பையனை அழைத்து, அவனுக்குப் புரியும் விதத்தில் எளிமையாக, இனிப்பு அதிகமாகச் சாப்பிடுவதால் ஏற்படும் தீமைகள் பற்றி பட்டியலிட்டார். “இப்படியான பொருளை கட்டாயம் உணவில் சேர்ப்பது அவசியமா?” என்று கேள்வி எழுப்பினார். ‘இல்லை’ என்பதுபோல சிறுவனும் தலையசைத்தான். “அப்படியெனில் அதிக இனிப்பு உண்பதை உடனடியாக விட முடியாவிட்டாலும், கொஞ்சம் கொஞ்சமாகக் குறைத்துக்கொண்டு, பின் கைவிடலாம்” என்று கூறினார் துறவி. ஒருவழியாக அவனும் ஒப்புக்கொண்டான். “இந்த அறிவுரையை அன்றே சொல்லியிருக்கலாமே சாமி! ஏன் ஒரு வாரம் கழித்து வரச்சொன்னீர்கள்?” என்று கேள்வி எழுப்பினார் அச்சிறுவனின் தாயார். “கடந்த வாரம் வரையிலும் நானே அதிகமாக இனிப்புகள் சாப்பிட்டுக் கொண்டிருந்தேன். அதனால் அப்போது உங்கள் மகனுக்கு அறிவுரை சொல்லுவது சரியல்ல என்று சொல்லவில்லை. ஒரு வார காலம் இனிப்பு சாப்பிடுவதை நான் நிறுத்திவிட்டேன். அதனால் இப்போது நான் சொல்லுவது சரியாக இருக்கும் என்பதால் சொன்னேன். அதுவும்கூட அறிவுரையாக இல்லாமல், அதிக இனிப்பினால் ஏற்படும் பிரச்சனைகளை அவனுக்குப் புரிய வைத்தேன்” என்றார் துறவி.

இதுதான் இன்றைய நிலை, “இன்றைய வளரிளம் பருவத்தினர், அறிவுரைகளைவிட ஆலோசனைகளைத்தான் அதிகமாக விரும்புகிறார்கள்” என்கிறார், குழந்தைகள் மனநல மருத்துவர் தேவகி. மேலும் அவர், “எப்போதுமே வளரிளம் பருவத்தினர் சந்திக்கும் சங்கடங்களில் முதன்மையானவை இரண்டு. முதலாவது, உடலில் ஏற்படும் மாறுதல்கள். அடுத்தது, உளவியல் குழப்பங்கள். இந்தச் சமயத்தில் இவர்களைக் கொஞ்சம் கவனமாகக் கையாள வேண்டும். இவ்வயதில் அவர்களுக்குள் ஏற்படும் மாற்றங்களே வாழ்நாள் பயணத்தின் முழுமைக்குமான முதல்படியாக இருக்கின்றன. இன்று சமூகம் கொண்டாடும் பல பெரிய மனிதர்கள் எல்லாம், பதின்பருவத்தில் பாதையை முடிவுசெய்து நடக்கத் தொடங்கியவர்கள்தாம். பிள்ளைகளுக்குத் தங்களைப் பற்றிய ஒரு சுய மதிப்பீடு வளர்ந்துவரும் இச்சமயத்தில், கட்டளைகளாக வரும் அறிவுரைகளை இவர்கள் அறவே வெறுக்கிறார்கள். அதேசமயம் ஆலோசனைகளை வரவேற்பவர்களாகவே இருக்கிறார்கள்.

இச்சமயத்தில் கட்டளைகள் இடாமல், அதிக நெருக்கடி கொடுக்காமல், கடிந்து கொள்வதைவிட, பிள்ளைகளின் மனம் அறிந்து பேசுவதே பலன் தரும். ‘தோளுக்குமேல் வளர்ந்தால் தோழன்’ என்ற பழமொழி நம்மூரில் இருக்கிறதல்லவா! பிள்ளைகளுக்கு ஒன்றும் தெரியாது என்று புறக்கணிக்காமல், பெற்றோர்கள் மனம் விட்டுப் பேசுவது நல்லது” என்கிறார், மருத்துவர் தேவகி.

வளரிளம் பருவத்தில் பிள்ளைகளுக்கு முதலில் எதிரியாகத் தோன்றுவோர் பெற்றோர்தாம். அதற்கு அவர்கள் கொட்டும் அறிவுரை மூட்டைதான் முக்கியக் காரணம் என்பதை மறுப்பதற்கில்லை. அறிவுரைக்கும் ஆலோசனைக்கும் நூலிழைதான் வித்தியாசம் என்பதைப் பெற்றோர் உணரவேண்டும்.

உங்கள் வீட்டுத் தொட்டியில் செடி வளர்க்கிறீர்கள். தொட்டிச்செடிக்கு சொட்டுச் சொட்டாக நீர் விடவேண்டும் என்பது உங்களுக்குத் தெரியும். அது தினமும் நீங்கள் செய்யும் வேலை. ஒருநாள் பிள்ளையிடம் அதைப் பணிக்கிறீர்கள். “சின்ன டம்ளர்ல தண்ணீர் எடுத்து ஊற்று, போதும்! பெரிய மக்குல அள்ளிக் கொட்ட வேண்டாம். என்ன புரியுதா? சொதப்பினா, செடி எல்லாம் நாசமாகப் போயிடும். ரொம்ப கஷ்டப்பட்டு வளர்த்திருக்கேன்..” என்று தொடங்கி தவளையாய்க் கத்தினால், அது கட்டளை வழியாகச் சொல்லப்படுகின்ற அறிவுரை. இதையே, “தொட்டியில செடி வளர்வதால், சின்ன ஒரு டம்ளர் தண்ணீரே போதும். நிறைய தண்ணீர் ஊற்றினா, செடி அழுகிடும். இல்லாட்டி மண்ணு இளகி, செடியோட வேர் எல்லாம் வெளியில வந்துடும். செடியோட வேர் வெளியே வந்துட்டா, அப்புறம் செடி வளருமா?” என்று கேள்வி கேட்பது, அவர்களையும் அப்பணியில் ஈடுபடுத்தி சிந்திக்க வைக்கும்.

இன்றைய பிள்ளைகளுக்குப் புரியாதது என்று எதுவும் கிடையாது. அவர்களை மதித்து, நாம் அவர்களுடன் உரையாடத் தயாரானால், பிள்ளைகளுக்குப் பெற்றோரைவிட நல்ல நண்பர்கள் யாரும் இருக்க முடியாது.

அறிவுரை சொல்லப் போறீங்களா? இதோ பிடியுங்கள் ஆலோசனைகளை..!

  1. வளரிளம் பருவத்தினருக்கு அம்மா, அப்பாவைவிட சித்தப்பா, சித்தி, அத்தை, மாமா, பள்ளி ஆசிரியர், ஆசிரியை, தோழன், தோழி என்று யாராவது ஒருவரை மிகவும் பிடித்துப் போயிருக்கும். பெற்றோர் சொல்ல வேண்டியதை, அவர்களின் வாயிலாகச் சொல்லச் சொல்லலாம். அப்போது பிள்ளைகள் காதுகொடுத்துக் கேட்க வாய்ப்புகள் அதிகம்.
  2. ‘சின்னப் பையன்.. இவனுக்கு என்ன தெரிந்துவிடப் போகிறது? எல்லாவற்றையும் நாம்தான் செய்யவேண்டும்’ என்ற எண்ணமிருக்கும் பெற்றோரே, பிள்ளைகளுக்கு அதிகம் கட்டளை இடுபவர்களாக இருக்கிறார்கள். அதனால், வளர்ந்துவரும் பிள்ளைக்கும் எதுவும் புரியும் என்பதை உணர்ந்து உங்கள் எண்ணங்களை, தோழமையாகப் பகிர்ந்து கொள்ளுங்கள்.
  3. வளரிளம் பருவத்தில் பிள்ளைகள் தங்களின் அழகுக்கு அதிகம் முக்கியத்துவம் கொடுப்பவர்களாக இருப்பார்கள். அவர்கள் உடுத்தும் ஆடைகளைப் பற்றி, பெற்றோருக்கு மாற்றுக் கருத்து இருந்தால், நாசூக்காக எடுத்துச் சொல்லலாம். மாறாக, மோசமான விமர்சனங்களைத் தவிர்க்க வேண்டும்.
  4. இதைச் செய்யாதே, அதைச் செய்யாதே என்று சொல்லுவதைவிட, இதை இப்படிச் செய்தால் இன்னும் சிறப்பாக இருக்கும் என்று சொல்லும்போது, பிள்ளைகள் கற்றுக்கொள்ள ஒரு வாய்ப்பு ஏற்படுத்தித் தருகிறோம் என்பதைப் பெற்றோர் உணர வேண்டும்.
  5. ஒரு செயலின் நன்மை தீமை பற்றி பிள்ளைகளுக்குப் புரியும்வண்ணம் எடுத்துச் சொல்லுவது நல்ல பயனைத் தரும்.

(நன்றி- செல்லமே ஜூன் 2015)

Posted in கட்டுரை, குழந்தை வளர்ப்பு | Tagged , , , , , , , | Leave a comment